Marami tayong pwedeng ihalintulad sa konsepto ng pagiging tao. Dahil sa mayamang pag-iisip ng mga tao ay may mga bagay tayong naiihalintulad sa buhay ng tao o sa kung paano nabubuhay ang isang tao. Ang tao ay ang bukod tanging nilikha na may kakayahan makapagisip ng kumplikado na malayo sa kayang gawin at maisip ng hayop. Ngunit dahil nga sa mayamang intelektwal na pag-iisip ng tao naihahalintulad ang mga bagay bagay sa buhay ng tao na tulad nalang ng hayop, halaman, at ng iba pa. Sa sanaysay na ito ay hayaan nyo ako na maipabatid ko sa inyo ang aking kaisipan sa kung papaano ko naiihalintulad ang buhay ng isang tao sa ibang bagay.
Ang tao ay parang halaman bukod sa nabubuhay ang halaman may mga pisikal na katangian ang halaman na pwedeng maihalintulad sa mas malalim na kahulugan sa konsepto ng pagiging tao. Alam naman natin na ang isang halaman ay nagsisimula sa isang buto na itinatanim sa lupa. Pagkaraan ng ilang araw lilitaw ang isang maliit na halaman o ang punla. Gaya ng isang punla, ang punla ay tila may iisang direksyon na kanyang tatanawin sa kanyang paglaki at ito ang pataas na direksyon. Ganun din ang isang batang uhugin na wala pang kamuang muang sa mundong tinatapakan natin ngayon. Ang isang bata ay tumitingala o tumitingin paitaas sa tuwing pinapakinggan nya ang kanyang magulang.
Kung oobserbahan natin ang isang maliit na halaman o punla mapapansin natin na tila nakaturo pa ito sa itaas na kung saan ang langit. Tila sabik sa paglaki ang isang munting halaman o punla kaya nga ito nakatingala gaya narin ng isang musmos na bata. Madalas natin marinig sa isang bata ang kanyang mga pangarap madalas ay tila sinasambit sambit nya sa kanyang mga bibig na nais na nilang lumaki agad. Sa isang munting halaman kaylangan bigayn ito ng kaukulang pag-aalaga na tulad na lang ng pagpapatubig. Sa bata naman kinakaylangan ng labis na pagaaruga na tulad na lamang ng pag-aalaga at pagtuturo ng tamang asal. Kung gusto mo na lumaking malusog ang iyong halaman ay dapat sa pagiging maliit pa lamang nito ay tamang pagpapatubig na at magandang lupa na agad ang ibigay mo sa halaman. Ang mga magulang ang nagsisilbing unang guro ng mga bata na kung saan sila ang nagtuturo ng kabutihang asal at leksyon tungo sa tamang landas na tatahakin ng isang bata.
Sa mga panahon na iyong ginugol sa pagaalaga ng halaman darating ang panahon na magiging isang puno ito na magkakabunga pa ng marami. Mula sa pagkabata, pagbibinata/ pagdadalaga iisa lang ang patutunguhan ng lahat ang pagtanda. Kung ang isang batang halaman ay tila tumitingala na sabik maging puno ang puno naman ay tila yuyuko ang mga sanga nito na tila nagbabadyang sabik bumalik sa pagiging batang halaman. Madalas ang mga nagkakaedad na mga tao ay binabalikan ang mga panahon na sila pa ay bata pa. Sa mga natahak nila sa kanilang buhay naikukumpara nila ang kanilang buhay noong bata pa sila sa buhay na meron sila ngayon. Aminin natin o sa hindi gusto nating bumalik sa nakaraan na kung saan binibigyan pa tayo ng importansya o pagaaruga ng mga taong masnakakatanda sa atin. O di kaya minsan ay sa mga tao naman na nakikilala natin tulad ng mga kaibigan natin noon.
Magiging iba na ang takbo ng panahon sa pagtahak natin ating buhay. Nakakalungkot man isipin na hindi na natin maibabalik ang mga panahong nagdaan. Maaring maliit o malaki ang ipinagbago ng nakaraan sa kasalukuyan ngunit ang mga alaala ng kahapon ang ating gugunitain. Mga alaala ng minsan tayo ay naging bata, nagbinata/ nagdalaga , nagkapamilya. Totoo nga na oras ang madaya sa buhay ng tao dahil ang oras ang hindi na pwedeng balikan na kung sino man kaya nga nasa huli lagi ang pagsisisi. Sa bawat maling desisyon sa buhay mo may kalakip na pagsisisi sa huli na maaring hindi mo maranasan ngayon pero darating ang panahon maiisip mo na kung maibabalik mo lang ang mga panahon ay tiyak malalaman mo kung ano ang dapat mong itinama sa nakaraan.
No comments:
Post a Comment